QR Premer-Mınıstriniń orynbasary Berdibek Saparbaev bastaǵan Úkimettik delegasıasy Qostanaı oblysyna keldi. Berdibek Saparbaevqa aldymen óńirdegi sport ınfraqurylymynyń damýy tanystyryldy.

Oblys ákimi Arhımed Muhambetov aıtqandaı, «Tobyl arena» maneji – ÝEFA talaptaryna saı keletin eldegi balamasy joq nysan.Munda halyqaralyq, el birinshiligi oıyndaryn ótkizýge bolady. Úlken fýtbolǵa arnalǵan jabyq arena memlekettik-jekemenshik áriptestik negizinde bir jyldyń ishinde turǵyzyldy. QR Premer-Mınıstriniń orynbasary alańda jattyǵý jasap júrgen jas aıaq-dop sheberlerimen kezdesti.

«Senderge oblys basshysy qanshama jaqsy jaǵdaı týǵyzyp otyr. Mynadaı alań Qazaqstanda joq. Sol sebepti, bar múmkindikti paıdalaný qajet. Sender elimizdi álemdik arenada tanytasyńdar. Sportpen shuǵyldanýdy únemi qoldap otyryńdar», -dep keńes berdi balǵyn fýtbolshylarǵa.

Berdibek Saparbaevtyń oblysqa sapary «Jastar saraıynda» jalǵasty. Qostanaılyqtar vıse-premerge ózderiniń alǵashqy tabystary jáne óńirdegi jastar bastamalary týraly aıtyp berdi. Oblystyq jastar resýrstyq ortalyǵynyń jetekshisi Aıgúl Abdýllınanyń sózinshe, jastarǵa qyzmet etý ortalyǵy birneshe baǵytta jumys isteıdi.