QR Prezıdenti Qasym-Jomart Toqaevtyń Jarlyǵymen qyzmettik boryshyn atqarý ústinde kóz jumǵan polıseı Darhan Bazarbaev İİİ dárejeli «Aıbyn» ordenimen nagradtaldy, dep habarlaıdy Aqorda.

«Qyzmettik boryshyn atqarý ústinde kórsetken erligi men janqıarlyǵy úshin İshki ister mınıstrligi Qostanaı oblysy Polısıa departamenti Qostanaı aýdany polısıa bóliminiń polıseıi Darhan Serikuly Bazarbaev İİİ dárejeli «Aıbyn» ordenimen nagradtalsyn (marqum)»,- delingen Jarlyq mátininde.

Eske salsaq, «102» púltine Tobyl qalasynyń turǵyny habarlasyp, Komsomolskı kóshesindegi úıde otbasylyq janjal týyndaǵanyn aıtqan.

«Patrúldik polıseıler Darhan Bazarbaev pen Amangeldi Syzdyqov oqıǵa ornyna 6 mınýttan soń jetti. Tártip saqshylary 28 jastaǵy úı ıesiniń óziniń otbasyn pyshaqtap óltirmek bolǵanyn anyqtady. Otbasy músheleri ol pyshaq alyp shyǵýǵa ketken ýaqytta, úıdiń esigin jaýyp tastaǵan. Kúdiktini ustaý barysynda polıseı pyshaq jaraqatyn alǵan. Alaıda ol otbasy qaýipsizdigi úshin qajetti sharalardy jasady. Oqıǵa ornyna kelgen jedel járdem qyzmeti Darhan Bazarbaevtyń kóz jumǵanyn aıtty», — dedi oblystyq polısıa departament bastyǵynyń keńesshisi Elena Kasharına.

Polıseıdiń artynda 4 aılyq sábıi qalǵan. Qazir kúdikti qamaýǵa alynyp, QR QK 99-baby boıynsha is qozǵaldy.