Qostanaı oblysynda jańa trıatlon saıabaǵy ashylmaq. Óńir basshysy Arhımed Muhambetov Qostanaı qalasyndaǵy saıabaq keshenin salý jumystarymen tanysty. Bul týraly ol «Instagram» paraqshasynda habarlady.
Oblys ákimi
baspasóz qyzmetiniń málimetinshe, qalanyń ortalyq jaǵajaı aýdanyndaǵy qurylys
jumysy 45 gektar aýmaqta júrgiziledi. Qala ákimi Qaırat Ahmetov aıtqandaı,
parkti qaıta jańartý jumystary jaqyn arada bastalady. Aldymen saıabaq kesheni
aǵymdaǵy jóndeýden ótedi.
Atap aıtqanda, kógaldandyrý jáne jańa tósemderdi ornatý, demalys aımaqtaryn
qurý, sondaı-aq shaǵyn sáýlet nysandaryn ornatý júrgiziledi. Bul keshende
trıatlon, júgirý jáne velosıped joldary bar jańa saıabaq salynatyn bolady.
Jańa saıabaqqa kirme joldardy salý múmkindigi de qarastyryldy. Arhımed Muhambetov qala ákimi Q. Ahmetovke jáne merdiger uıymdardyń basshylaryna jumysty tıimdi jáne merziminde júrgizýdi tapsyrdy.
Sonymen qatar, bıyl Qostanaı oblysynda Jumyspen qamtýdyń jol kartasy aıasynda jobalardy iske asyrýǵa 53,7 mlrd teńge bólindi.
Oblysy ákimi Arhımed Muhambetovtiń tórǵalyǵymen ótken keńes barysynda Jumyspen qamtýdyń jol kartasy sheńberinde jobalardy iske asyrý máseleleri qaraldy. Oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Gúlnar Ábenovanyń aıtýynsha, Jol kartasy jumyssyz azamattar sanynyń ósýine jol bermeýge, qosymsha jumys oryndaryn qurýǵa jáne eldi mekenderdiń ınfraqurylymyn damytýǵa baǵyttalǵan.
«2020 jyly jobalardy iske asyrýǵa 53,7 mlrd teńge qarastyrylǵan. Onyń ishinde 15 mlrd teńge – aǵymdaǵy nysanaly transfertter esebinen, 38,8 mlrd teńge jergilikti atqarýshy organdardyń oblıgasıalar shyǵarylymy esebinen alyndy. Aımaqta 275 ınfraqurylymdyq jobalardyń tizimi quryldy. Jobalardy irikteý kezinde iri kásiporyndary bar monoqalalarǵa jáne oblys ortalyǵyna basymdyq berildi», — dedi baıandamashy.
Jobalardy iske asyrý 13435 turaqty jumys ornyn qurýǵa múmkindik beredi. Qazirdiń ózinde jumyspen qamtý ortalyqtarynyń baǵyttary boıynsha 6718 jumyssyz azamat jumysqa ornalasty. Jalpy, Qostanaı oblysynda 31 myń adam Jumyspen qamtý sharalarymen qamtylmaq.
