Еженедельная региональная аграрная общественно-политическая газета, г.Костанай, ул.Тәуелсіздік 83, Офис 623, 54-08-30, 91-78-51 kostanay-agro@mail.ru

Мы в соцсетях

Jol jóndeýge 44,9 mlrd teńge

Bıyl Qostanaı oblysynda 517 shaqyrym jol jóndeledi. Ol úshin búdjetten 44,9 mlrd teńge jumsalady. Bul týraly oblys ákimdiginiń baspasóz qyzmeti habarlaıdy.

QR Premer-Mınıstri Asqar Mamınniń tóraǵalyǵymen ótken QR Úkimetiniń selektorlyq otyrysynda 2015-2019 jyldarǵa arnalǵan «Nurly jol» ınfraqurylymdyq damý memlekettik baǵdarlamasyn iske asyrý barysy jáne 2020-2025 jyldarǵa arnalǵan jobasy qaralǵan bolatyn. Baǵdarlamany iske asyrýdyń alǵashqy jyly respýblıkalyq jáne jergilikti mańyzy bar 9,5 myń shaqyrym avtojol jóndeý jumystarymen qamtylamaq. Onyń ishinde respýblıkalyq joldardyń 4 myń shaqyrymynda qurylys jáne qaıta jańartý jumystary júrgiziledi, 1,5 myń shaqyrymy tolyq jóndelse, 4 myń shaqyrym jergilikti mańyzdaǵy jol retke keledi.

Al Qostanaı oblysynda «Nurly jol» memlekettik baǵdarlamasy aıasynda 515 shaqyrym tas jol jóndeýden ótedi. Oblystyq jolaýshylar kóligi jáne avtomobıl joldary basqarmasynyń basshysy Oljas Nurǵalıevtyń aıtýynsha, osy jyly jol ınfraqurylymy sheńberinde 281 joba júzege asyrylady. Onyń ishinde «Nurly jol» baǵdarlamasy boıynsha – 18,5 mlrd teńge, «Jumyspen qamtýdyń jol kartasy» aıasynda – 20,3 mlrd teńge, «Aýyl-El besigi» arnaıy jobasy men jergilikti búdjetten 6,1 mlrd teńge qarastyrylǵan.

«Barlyǵy 517 shaqyrym jol jóndeledi. Buǵan 44,9 mlrd teńge jumsalady. Jol jóndeý nysandaryn jaýapkershiligine alatyn merdiger uıymdar anyqtaldy. Qazir 105 nysan boıynsha qurylys-montaj jumystary bastaldy. Baǵdarlama aıasynda 4982 adam jumysqa ornalastyryldy, onyń ishinde jumyspen qamtý ortalyqtary arqyly 2491 adam alyndy. Jóndeý jumystaryn ýaqytyly jáne sapaly júrgizý úshin qala jáne aýdan ákimderi merdigerlik uıymdarmen birlesip jumys júrgizýdiń kúntizbelik kestelerin ázirledi», — deıdi oblystyq jolaýshylar kóligi jáne avtomobıl joldary basqarmasynyń basshysy Oljas Nurǵalıev.

Óńirde kópten beri turalap qalǵan «Qarabutaq-Qostanaı» tas jolyn jóndeý jobasy jandanady. Merdiger uıymdar Rýdnyı qalasynan Denısov aýylyna deıin jol-qurylys jumystaryn júrgizýdi josparlaýda. Joldyń jalpy qashyqtyǵy – 114 shaqyrym. Qazir atalǵan ýchaskede jumys qyzý júrip jatyr. Jer tóseminiń qurylymy, jol qabatynyń sapaly tóselýi oblys ákiminiń baqylaýynda bolmaq.

Joba aıasynda sý ótkizý qubyrlary, jol aıyryǵy, qyzmet kórsetetin pavılondary bar demalys alańdary qarastyrylǵan. Bıyl joldyń Tobyl stansıasy men Rýdnyı qalasy aralyǵyndaǵy ýchaskelerde tıisti jumystar bastaldy. Jol ýchaskeleriniń jalpy uzyndyǵy 49 shaqyrymǵa teń. Nysan 2022 jyly paıdalanýǵa beriledi.