Qostanaı oblysynda «Jumyspen qamtýdyń jol kartasy-2020» baǵdarlamasy aıasynda 724 mln teńgege 12 sport nysany retke keltiriledi. Bul týraly obylstyq ákimdiktiń baspasóz qyzmeti habarlady.

Jaqynda Rýdnyıdaǵy №1 qalalyq balalar-jasóspirimder sport mektebinde kúrdeli jóndeý jumystary bastaldy. Munda ınjenerlik komýnıkasıalar júrgizilip, qabyrǵalary boıalyp, edenderi men terezeleri aýystyrylady. Jalpy sport mektebiniń ǵımaraty 1971 jyly salynǵan. Búginde munda 7-20 jas aralyǵynda 1011 adam sportpen shuǵyldanady. Negizinen basketbol sportyna ekpin túsirilgen. Óıtkeni sporttyń osy túrinen qalalyq sport mektebi oblystyń birneshe dúrkin chempıondaryn tárbıelegen.

«Jumyspen qamtýdyń jol kartasy-2020» baǵdarlamasy sheńberinde Rýdnyı qalalyq №1 balalar-jasóspirimder sport mektebiniń ǵımaratyn aǵymdaǵy jóndeý boıynsha jumystar júrgizilýde. Jumystardy Rýdnyı qalasynyń «Nomad» merdigerlik uıymy oryndaıdy. Jobanyń quny 36 mln teńge. Jumystardy aıaqtaýdyń josparlanǵan merzimi 2020 jylǵy 31 shilde. Qazir 12 jańa jumys orny quryldy, onyń ishinde 6 adam qalanyń jumyspen qamtý ortalyǵy arqyly alyndy», — dep atap ótti oblystyq sport basqarmasyndaǵylar.

№1 BJSM dırektory Valerı Galımzánovtyń aıtýynsha, osy jyldar boıy mektepte az qarajatpen árleý-ákteý jumystary ǵana júrip kelgen. Ótken jyly ǵana mundaǵy oıyn zalynda jańa parket salyndy.

«Endi sportzalǵa úlken terezeler salynyp, qabyrǵalary tolyǵymen boıalady. Sheshiný bólmelerinde kafel jabyny men santehnıkany aýystyrady. Kabınetter men dálizderdegi esikter men eden jabyndary jańarady. Jóndeý jumystarynan keıin toǵyzqumalaq bólmesi ashylady. Qasbeti zamanaýı materıaldarmen árlenedi, eki kireberisi de jóndeledi. Múmkindigi shekteýli azamattarǵa arnalǵan pandýstyń ornyna elektr kótergish ornatylady», — deıdi sport mektebiniń basshysy.

Jospar boıynsha sport mektebi osy jyldyń tamyz aıynda tolyq kúshinde jumys isteıdi.