Aımaqtaǵy jol jóndeý jumystaryn júzege asyrý barysynda jumys kúshi retinde jergilikti turǵyndardy kóptep eńbekke tartý mańyzdy. «Jumyspen qamtýdyń jol kartasy» baǵdarlamasynyń basty maqsaty da osy. Memleket qarjysyna jóndelip jatqan jol, ıa ońdalyp jatqan nysan sol mańaıdaǵy jumyssyzdyq máselesiniń sheshilýine de yqpal etýi tıis.

Baǵdarlamanyń óńirde júzege asyrylý barysy búgin oblys ákimdiginde talqylandy.

Jıynda jolaýshylar kóligi jáne avtomobıl joldary basqarmasy basshysynyń orynbasary oblystaǵy kúre joldardyń ońdalýy barysynda eńbekke tartylǵan turǵyndar týraly esep berdi.

A. Kostúkovtyń málimetinshe, «Jumyspen qamtýdyń jol kartasy» baǵdarlamasy boıynsha aımaqta jyl basynan beri 5,4 mlrd teńge ıgerilgen. Baǵdarlama boıynsha jalpy sany 5064 adamdy eńbekpen qamtý josparlanǵan. Qazirdińózinde 939 adam jumysqa turypty.

– 30 shaqty nysanda qurylys-montaj jumystary áli bastala qoıǵan joq. Taıaý kúnderi Áýlıekól, Beıimbet Maılın, Qamysty aýdandarynda 3 joba qolǵa alynady. Altynsarın aýdanynda 2, al oblys ortalyǵynda 25 jobany júzege asyrýdy bastaımyz. Bul jobalar 2 myńnan astam adamdy jumyspen qamtýǵa múmkindik beredi. Olardyń deni jumyspen qamtý ortalyqtary arqyly jumysqa ornalasatyn bolady. Munyń syrtynda, jol jóndeý jumystaryna paıdalanylatyn materıaldardyń 90%-y jergilikti kásiporyndardan satylyp alynady, — dedi jolaýshylar kóligi jáne avtomobıl joldary basqarmasy basshysynyń orynbasary A.Kostúkov.

Oblys ákimi Arhımed Muhambetov jol qurylysyna jaýapty mekeme basshylaryna merdigerlermen kelisim shart jasaýda asa muqıat bolyp, jol jóndeý jumystarynyń oryndalý sapasyn qatań baqylaýdy tapsyrdy.