Qostanaı oblysynyń ákimi Arhımed Muhambetov qala men aýdan ákimderimen selektorlyq keńes ótkizip, áleýmettik mańyzy bar azyq-túlik baǵasyn turaqtandyrý máselesin qarastyrdy. Bul týraly ol óziniń «Instagramdaǵy paraqshasnyda habarlady.

Jıyn barysynda baǵany retteý boıynsha qabyldanyp jatqan sharalar pysyqtalyp, turaqtandyrý qoryn tolyqtyrý jaǵy sóz etildi. Jergilikti bılik ókilderiniń sózinshe, bizdiń oblysta azyq-túlik taýarlarynyń 19 túriniń baǵasy respýblıkalyq ortasha kórsetkishten tómen. Jalpy, áleýmettik mańyzy bar azyq-túlik taýarlarynyń baǵa ındeksi jyl basynan beri 103,6% qurady. Turaqtandyrý qoryna áleýmettik mańyzy bar azyq-túlik taýarlarynyń 13 túrinen 6,6 myń tonna kóleminde qor jasaldy.

Qazirdiń ózinde saqtaý oryndarynda 395,8 mln teńgeniń 1,9 myń tonna ónimi saqtaýly. Jıynda aýyl sharýashylyǵy maqsatyndaǵy jerlerdi tıimdi paıdalaný máselesi de talqylandy. Oblysta pılottyq rejımde aýyl sharýashylyǵy maqsatyndaǵy jerlerdi paıdalanbaý nemese utymsyz paıdalaný faktilerin anyqtaý maqsatynda ǵaryshtyq monıtorıń júrgizilýde. Tekserý nátıjeleri boıynsha paıdalanylmaı jatqan jerler anyqtalyp, nysandardy keri qaıtarý boıynsha jumystar júrgizildi.

Basqosý sońynda Arhımed Muhambetov áleýmettik mańyzy bar azyq-túlik taýarlary baǵasynyń ósýine jol bermeýdi, apta saıyn olardyń baǵasyna baqylaý júrgizýdi tapsyrdy. Sondaı-aq, aýyl sharýashylyǵy maqsatyndaǵy jerlerdi utymsyz paıdalanatyndardy anyqtaý boıynsha júrgizilip jatqan jumysty odan ári jandandyrý qajettigin atap ótti.