Qala ortalyǵynda búgin tańǵy toǵyz bolmaı ashylǵan jappaı saýda alańynda negizinen et, kartop, kókónis, sút pen jumyrtqa, un ónimderi satyldy. Azyq-túlik baǵasy naryqtaǵydan edáýir tómen. Óıtkeni tutynýshy ónimdi eshbir deldalsyz taýar óndirýshiniń qolynan tikeleı satyp alady.

Búgingi jármeńkege 130-dan astam sharýa qojalyqtary óz ónimderin ákeldi. Tarazy basynda saýdalanatyn taýardyń jalpy kólemi 140 tonnanyń ústinde. Qala halqyna 28 tonna et ónimderi, 19 tonna sıyr eti, 5 tonna jylqy eti, 100 keli qoı eti, 400 tona qus eti arzan baǵamen usynylyp otyr.

Sonymen qatar, 14 tonna joǵarǵy surypty un, 5,5 tonna makaron, 144 myń jumyrtqa, 10 tonna ósimdik maıy ákelindi. Turaqtandyrý qorynan jalpy kólemi 55 tonna bolatyn 7 túrli áleýmettik mańyzy bar azyq-túlik saýdalanady, dedi aýyl sharýashylyǵy basqarmasynyń basshysy Tımýr Bısembaev.

Qala turǵyndary mundaı senbilik jármeńkelerdiń shekteý sharalaryna qaramastan jıi ótip turǵanyn qalaıdy. Óıtkeni saýdasy júrgen satýshy da, arzan baǵaǵa keregin tapqan tutynýshy da rıza.

— Sıyr etin 1800 teńgeden sattym. Bir jarym saǵattyń aınalasynda túk qaldyrmaı alyp ketti. Keshe ádeıi dúkenge kirip, ettiń baǵasyn bildim. Sıyrdyń bir keli eti 2600-2800 teńgeden satylyp jatyr. Alypsatarlarǵa et ótkizeıin desem, kelisin 1200 teńgeden suraıdy. Búgin munda kelip, óz mańdaı terimmen baqqan maldy laıyqty baǵaǵa ótkizdim. Bizge de jaqsy, satyp alýshyǵa da tıimdi. Sondyqtan halyqqa jármeńkeniń aptasyna bir bolmasa da, aıyna eki ret ótip turǵany paıdaly,-deıdi Altynsarın aýdanynan kelgen fermer Marat Saǵyndyqov.