Еженедельная региональная аграрная общественно-политическая газета,
г. Костанай, ул. Тәуелсіздік, д. 83, офис 620, 54-08-30, 91-78-51 kostanay-agro@mail.ru

Мы в соцсетях

Ахмет бейнесі – Шымкентте

8 июля 2022 16:18 • 699 просмотров

Шымкент қаласында маусым айының 28–29 күндері жазушы-драматург Ақылбек Шаяхметтің «Ахмет» драма-реквиемінің премьерасы болды. Оған Қостанайдан арнайы шақырылған автор қатысты. Спектакльдің режиссері – Әліби Жанәбілов. Қоюшы-суретші – Жомарт Дүйсебеков. Ахмет рөлін сомдаған – жас актер Еркебұлан Әйтенов.

Шымқала актерлерінің бұл спектаклі Ахаң тойына лайықты тарту болды. Премьераға қатысқан қонақтар – Жұмат Шанин атындағы қазақ драма театрының белді актері Еркінбек Шымырқұлов, осы театрдың әдебиет бөлімінің меңгерушісі, көрнекті драматург Сая Қасымбек, Қазақстан жазушылар одағы Шымкент филиалының директоры Дәркен Танабай, сценарист, анимациялық киноның продюсері, кинематографтық жүлделердің лауреаты, «Жебе» студиясының жетекшісі Керімбек Ниязбаев, басқа да қаламгерлер мен көрермендер театр қойылымын жақсы бағалап, сәт сапар тіледі.

Пьеса авторы Ақылбек Шаяхмет театр директоры Самат Алтай мен режисер Әліби Жанәбіловке Қостанай облыстық мәдениет басқармасының басшысы Ерлан Қалмақовтың алғыс хаттарын және Қобыланды батыр мен Ахмет Байтұрсынұлы атындағы медальдарды табыс етті.

Қойылым тұсаукесері өтіп жатқан күндері Әл-Фараби атындағы Шымент қалалық орталық кітапханасы және қаладағы жасөспірімдер кітапханасы пьеса авторы Ақылбек Шаяхметпен кездесулер өткізді. Автор жергілікті телеарнаның арнайы бағдарламасына қатысып, сұқбат берді.

Бетті дайындаған Бақыт ТҰРАШ, суреттерді түсірген автор