Elimizde alımentten jaltaryp, baýyr eti balasynan bas tartqan bóriktilerdi quryqtaý hám jaýapqa tartýdyń san túrli ádisi oılastyrylýda. Elbasy N.Nazarbaev óziniń «Qazaqstan-2050» strategıasy – qalyptasqan memlekettiń jańa saıası baǵyty» atty Qazaqstan halqyna joldaýynda ana men balaǵa qarsy baǵyttalǵan qylmys (onyń ishinde alıment tólemegeni) úshin, sondaı-aq, osy saladaǵy eń usaq degen zań buzýshylyqtar úshin jazany kúsheıtý qajet dep tapsyrma bergen.

Otbasynyń oıranyń shyǵaryp, balasynan bas tartqan er-azamattardyń sany kún saıyn artyp keledi. Tutas qoǵamnyń indeti bolyp otyrǵan jáıdiń biri – jastardyń ajyrasýy. Jas shańyraqtyń shaıqalýyna ne túrtki bolatynyn dál basyp aıtý qıyn. Deı turǵanmen, keıde teris oıdyń jetegine erip, jas-jubaılardyń birin-biri qurmetteı ala almaýynyń syry túrli sebepterge toly. Sońǵy derekter boıynsha Qazaqstanda jarty mıllıonnan astam jalǵyz basty ana bar.

Al dúnıe esigin ashatyn árbir besinshi bala nekesiz ómirge keledi. Bul bizdiń elimizde myńdaǵan áıel jesir, myńdaǵan bala jetim ómir súrip jatyr degen sóz. Taǵy myńdaǵan áke urpaǵynyń nápaqasyn ýaqytyly tóleý úshin janyn jaldap júr. Óz qaǵynan ózi jerip, qashyp júrgen «asqar taýlar» óz aldyna.