Qalalyq balalar shyǵarmashylyq mektebi bazasynda dástúrge aınalǵan zıatkerlik, sporttyq jáne shyǵarmashylyq konkýrstarda jeńimpaz atanǵan jalpy sany 100-den astam oqýshy qatysqan jańajyldyq kesh ótti. Maqsat – daryndy balalar men tanymdyq qyzyǵýshylyq damytýdy qoldaý, qalalyq mektep oqýshylaryn yntalandyrý.
Atalmysh sharaǵa qala ákimi Qaırat Ahmetov qatysyp, aldaǵy jyly bolatyn aıtýly oqıǵalarǵa toqtalyp, qatysýshylarǵa jyly lebizin bildirdi.
–Bıyl Jastar jyly Qostanaı qalasynyń óskeleń urpaǵynyń bilim, ǵylym jáne sporttaǵy joǵarǵy nátıjelerimen este qalmaq. Oqýshylarda aldynda turǵan jańa ıdeıalar men jobalardyń iske asýy úshin úlken múmkindikter bar. Barshańyzdy kele jatqan Jańa jyl merekesimen quttyqtaımyn. Barlyqtaryńa zor densaýlyq, baqyt, otbasylaryńyzǵa amandyq tileımin, – dedi qala ákimi Qaırat Ahmetov.
Shara barysynda oqýda ozat atanyp, túrli dodalarda oblystyń dańqyn kótergen oqýshylar marapatqa ıe boldy. Marapattaý rásiminde 2019 jyly qalamyzdy respýblıkalyq jáne halyqaralyq deńgeılerde qorǵaǵan 10 mektep kóshbasshylaryna Alǵys hat jáne «Úmit» statýetkasy berildi. Sonymen qatar, ál-Farabıdiń 1150 jyldyǵy men Abaı Qunanbaevtyń 175 jyldyq mereıtoıyn merekeleýge arnalǵan qalalyq esse konkýrsynyń 6 jeńimpazy men júldegerlerine ákimniń gramotasy tabystaldy.
