Óńirlik komýnıkasıa qyzmetinde BAQ ókilderimen kezdesken Qostanaı oblysynyń bilim salasynda sapany qamtamasyz etý departamentiniń basshysy Oral Qappasov: — 167 aýyldyq eldi mekende bilim berý uıymdary joq. Bul eldi mekenderde mektep jasyndaǵy 1538 bala turady. Olar kórshi aýyldardaǵy mektepterge arnaıy bólingen avtobýspen qatynap oqıdy. Tehnıka parki jańartýdy qajet etedi. Osy maqsatta 2022 jylǵa deıin 30 avtobýs satyp alý josparda bar, — dedi.

Basqarma basshysynyń aıtýynsha, oblysta 47 mektep kúrdeli jóndeýdi talap etedi. Oǵan jalpy somasy 14 mlrd teńge qarjy kerek. Bıyl 3 mlrd teńge qarjyǵa 15 mektepti jóndeýden ótkizý josparlanyp otyr. Oblysta 3 mektep apatty jaǵdaıda tur. Aldaǵy ýaqytta bul ǵımarattardyń ornyna árqaısy 320 oryndyq 3 jańa mektep salynbaq. Búginde birinshi mekteptiń qurylysy bastalyp ta ketti. Byltyr Áýlıekól aýdanyna qarasty Amanqaraǵaı aýylynda apatty jaǵdaıda turǵan eski mekteptiń ornyna jańa mektep salyna bastaǵan. Onyń qurylysy bıyl shilde aıynda aıaqtalmaq. Qalǵan eki mektep 2023 jylǵa deıin salynyp, paıdalanýǵa beriledi.

Oral Qappasov aldaǵy ýaqytta mektepke deıingi bilim berý salasyn damytý baǵytynda da qyrýar sharýa kútip turǵanyn aıtty. Oblysta Bilim men ǵylymdy damytýdyń memlekettik baǵdarlamasy aıasynda sońǵy 4 jyl ishinde jalpy sany 2750 oryndyq 26 balabaqsha iske qosylyp, 125 shaǵyn ortalyq tolyq jumys kúni tártibine aýysqan. Soǵan qaramastan, búginde oblys boıynsha 17 myń bala balabaqsha kezeginde tur. Óńirde 183 balabaqsha, 408 shaǵyn ortalyq bar. Munda jumys istep jatqan tárbıeshi-ustazdardyń kóbi mamandyǵy boıynsha beıindi pedagogıkalyq bilim almaǵan.