Respýblıkalyq «Biz birgemiz» aksıasy aıasynda Qostanaı oblysynda 3,5 myń adam kómek aldy. Bul týraly oblys ákimi Arhımed Muhambetovtiń tóraǵalyǵymen ótken selektorlyq keńeste málim etildi.
Elbasy Nursultan Nazarbaevtyń tapsyrmasyna sáıkes «Nur Otan» partıasy «Kedergisiz keleshek», «Baqytty otbasy» jáne «Ardagerlerdi ardaqtaıyq!» jobalary aıasynda «Biz birgemiz» aksıasyn bastaǵan bolatyn. Oblysta áleýmettik jaǵynan osal azamattardyń tizimi quryldy.
«Aksıany uıymdastyrý barysynda partıanyń Qostanaı oblystyq fılıaly men oblystyq jumyspen qamtýdy úılestirý jáne áleýmettik baǵdarlamalar basqarmasy muqtajdar tizimin jasady. Olardyń arasynda az qamtylǵan, kópbalaly otbasylar, erekshe qajettilikteri bar adamdar, Ekinshi dúnıejúzilik soǵysynyń ardagerleri jáne jalǵyz turatyn qart adamdar bar. Barlyǵy 3541 adam kómek aldy. Bul jumys áli de jalǵasady», — dedi «Nur Otan» partıasynyń Qostanaı oblystyq fılıaly tóraǵasynyń birinshi orynbasary Eldar Kúzenbaev.
Halyqtyń áleýmettik osal toptaryna antıseptıkter, maskalar jáne birinshi qajettilik ónimderi jetkizilýde. Azyq-túlik sebetine makaron, qaraqumyq, kúrish, qant jáne ósimdik maıy, qara shaı, tuz, tátti nan kiredi. Eldar Kúzenbaevtyń aıtýynsha, eriktilerdiń mobıldi brıgadalary uıymdastyrylǵan. Oǵan partıa músheleri men «Jas Otan» jastar qanatynyń belsendileri kirdi.
Jalpy oblys boıynsha 250 adamnan turatyn osyndaı 20 top jumys isteıdi. Aksıanyń alǵashqy kúnderi 443 otbasy kómekke ıe bolǵan. Oblys ákimi Arhımed Muhambetov partıa jobasyn júzege asyrýda Aýyl sharýashylyǵy taýar óndirýshileri men kásipkerlerdiń belsendi jumysyn atap ótti. Sondaı-aq, óńir basshysy partıa fılıaldarynyń qoǵamdyq qabyldaý bólmesiniń jumysyn toqtatýdy tapsyrdy.
«Ákimder turǵyndardyń turmystyq máselelerin baqylaýda ustaýy tıis. Halyq arasynda kóptegen suraqtar týyndaıdy, jańa problemalar paıda bolýy múmkin. Aýdan-qala ákimderine onlaın rejımde jáne partıa fılıaldarynda ornatylǵan jáshikter arqyly kelip túsken hattarǵa der kezinde jaýap berýdi tapsyramyn. «Biz birgemiz!» biryńǵaı respýblıkalyq aksıasy aıasynda atqarylyp jatqan jumystardy toqtatpaý qajet», — dedi oblys basshysy Arhımed Muhambetov.
