Qostanaı oblysynda Jumyspen qamtýdyń jol kartasy sheńberinde 1 049 jumys orny quryldy. Bul týraly oblys ákimi Arhımed Muhambetov áleýmettik jelide jazdy.

Oblys ákimdiginde ótken keńes barysynda «Jumyspen qamtýdyń jol kartasy» jobasy sóz etildi. Búginde baǵdarlamanyń oryndalýy qýantarlyq. Pandemıa ýaqytyna qaramastan josparlanǵan 275 jobanyń 99-y iske asyryla bastady.

«1 049 jumys orny qurylyp, jumyspen qamtý ortalyqtary arqyly 576 adam jumysqa turǵan. Jalpy jumyspen qamtý jol kartasy aıasynda shamamen 13,5 myń jumys orny ashylady. Áleýmettik-mádenı sala, turǵyn úı-kommýnaldyq sharýashylyq, ınjenerlik-kóliktik ınfraqurylym obektilerin jóndeý, salý, qaıta jańartý, eldi mekenderdi abattandyrý jónindegi jobalardy iske asyrý kózdeledi», — dep jazdy aımaq basshysy Arhımed Muhambetov.

Basqosýda 2020 jyldyń 4 aıyndaǵy áleýmettik-ekonomıkalyq damý qorytyndylary da qaraldy. Jyl basynan beri óńirde barlyq makroekonomıkalyq kórsetkishtiń ósýi baıqalady. Atap aıtqanda, ónerkásip óndirisi 15,4%, aýyl sharýashylyǵy 2,3%, ınvestısıalar 8,5%, qurylys jumystary 6,8%, turǵyn úı paıdalanýǵa berý 3,1%-ǵa ulǵaıǵan.

«Keıbir saladaǵy áleýmettik-ekonomıkalyq kórsetkishterdiń ósimi baıaý. Kóptegen kásiporyndar men uıymdardyń qyzmeti toqtady. Oǵan koronavırýs pandemıasy áser etkenin atap ótkim keledi. Qazirgi ýaqytta olardyń jumys tártibi birtindep qalpyna keltirilýde, granttar, sýbsıdıalar, shaǵyn nesıe berý túrinde jan-jaqty memlekettik qoldaý kórsetiledi», — dep atap ótti oblys ákimi Arhımed Muhambetov.

Qostanaı oblysynyń basshysy qalalar men aýdandardyń ákimderine, memlekettik mekeme basshylaryna áleýmettik-ekonomıkalyq kórsetkishterdiń ósýin qamtamasyz etý boıynsha tıisti sharalar qabyldaýdy tapsyrdy.