Qostanaı oblysynyń tabıǵat qorǵaý polısıasynyń qyzmetkerleri óńirdiń ońtústik aımaqtarynda aqbóken popýlásıasyn qorǵaý boıynsha reıd sharalaryn júrgizýde, dep habarlaıdy oblystyq polısıa departamenti baspasóz qyzmeti.
Polısıaǵa Amangeldi jáne Jangeldın aýdandarynyń qoryq qyzmetkerleri kómektesýde. Reıd barysynda mobıldik toptar Qostanaı oblysy men Qaraǵandy jáne Aqtóbe oblystary shekarasyndaǵy aqbóken mekendeıtin 4 myń kılometrden astam aýmaqty súzip shyqty.
«Bul aýmaqtar negizinen aqbókenniń Betpaqdala popýlásıasynyń tirshilik etý ortasy sanalady. Kıik kóbine Jangeldın aýdany perımetrinde tóldeıdi. Karantınge baılanysty bıyl oblysta kóktemgi ań aýlaý maýsymynyń ashylýy áli jarıalanǵan joq. Sondyqtan kıeli janýarlardy dál osy kezeńde brakonerlerden qorǵaýdy kúsheıtip otyrmyz. Áriptesterimiz taıaýda ǵana aqbóken múıizin ınternet arqyly satqan qylmyskerlerdi quryqtady», — dedi Tabıǵat qorǵaý polısıasy bóliminiń bastyǵy Talǵat Ahmetov.
Talǵat Ahmetovtiń aıtýynsha, polıseılerdiń tynymsyz eńbeginiń arqasynda oblysta sońǵy ýaqytta tabıǵatqa qastandyq jasaý qylmysy birshama báseńdegen. Jyl basynan beri tabıǵat qorǵaýǵa qatysty 246 zań buzýshylyq tirkelip, 2 mln teńgege jýyq aıyppul salynǵan.
