Qostanaı oblysynda jyl aıaǵyna deıin 13 myńnan astam jańa jumys orny ashylady, dep habarlaıdy Qostanaı oblysy ákiminiń baspasóz qyzmeti.

Qostanaı oblysynda «Jumyspen qamtýdyń jol kartasy 2020» baǵdarlamasyn oryndaý negizinde oblystyq jospar túzildi. Óńirde 275 nysan jóndeý jumystarynan ótedi. Nátıjesinde birneshe myń ýaqytsha jumys orny paıda bolmaq.

«Jumyspen qamtýdyń jol kartasy boıynsha Qostanaı aýdanynda atqarylar shara kóp. Bıyl bul aýmaqta ınfroqurylymdy damytý negizinde 27 nysandy jańǵyrtý josparlanyp otyr. Aýdanǵa osy jyly 4,3 mlrd teńge bólindi. Bul somaǵa 27 nysan qalypqa keltiriledi. Onyń tórteýi – bilim salasynyń obektileri. Mádenı oryndardy jóndeýge 111 mln teńge qarastyrylǵan. Sonymen qatar Zarechnyı aýylyndaǵy stadıon abattandyrylady. Ony jabdyqtaýǵa 72 mln teńge bólingen. Bıyl aımaqtaǵy tehnıkalyq jáne kásiptik bilim berý mekemelerin 6700 stýdent bitiredi. Olardy jergilikti jumyspen qamtý ortalyqtary jumysqa turǵyzady», — delingen oblys ákiminiń baspasóz habarlamasynda.

Al Qostanaı qalasynda «Jumyspen qamtýdyń jol kartasy 2020» baǵdarlamasy sheńberinde 91 joba iske asyrylady. 17 –áleýmettik, 10 – bilim berý, 3 – densaýlyq saqtaý, 2 – sport jáne áleýmettik qorǵaý salasynda. Turǵyn úı-kommýnaldyq jobalar baǵyty boıynsha 74 joba kózdelgen. Eger bekitilgen barlyq jobalardy júzege asyrý múmkin bolsa, onda 6300-den astam jumys orny qurylady. Olardyń úsh myńnan astamyna kásip taýyp berý Jumyspen qamtý ortalyǵynyń mindetinde.