Qostanaı oblysynda mektepterdi kompúterler jáne ınternetpen qamtamasyz etý úshin qomaqty qarjy bólinedi, dep habarlaıdy oblystyq bilim basqarmasynyń basshysy Vasılı Symbalúk.

Óńirde bilim salasyn qarjylandyrý kólemi eki esege artqan. Sonyń nátıjesinde mektep ınfraqurylymyn damytýǵa mol múmkindik týyp otyr. Máselen, bıyl jańadan 3 mektep boı kóteredi. 130- ǵa jýyq bilim berý ǵımarattaryna jóndeý júrgizý josparlanǵan. Basty kórsetkish – bilim salasyn sıfrlandyrý jumystary jaqsardy.

«Oblys mektepterine 6 myńǵa jýyq jańa kompúter satyp alyndy. Oǵan shamamen 1,4 mıllıard teńge bólindi. Mektepterdiń 80 paıyzy kompúterlermen jaraqtandyryldy. Karantın rejımi engizilgeli qashyqtan oqýǵa kóshtik. Bul sıfrlyq bilim berýdiń qajettiligin kórsetti. Bilim nysandaryn keń jolaqty ınternetpen qamtamasyz etý maqsatynda búdjetten 153 mln teńge qarastyryldy. Jalpy, sońǵy úsh jylda mesenattardyń kómegimen óńirde 66 IT-synyp pen 31 robototehnıka kabıneti ashyldy», — dedi oblystyq bilim basqarmasynyń basshysy Vasılı Symbalúk.

Basqarma basshysy aıtqandaı, oqýshylardyń jazǵy demalysy qatań baqylaýǵa alynady. Sanıtarlyq- epıdemıologıalyq talaptar demalys lagerlerinde saqtalady. Bıyl oblys aýmaǵynda úsh lager jumys isteıdi.

Olar: General Bákirov atyndaǵy demalys bazasy, «Lesnaıa skazka» jáne «Altyngúl» saýyqtyrý lagerleri. Demalys aımaqtaryna ata-anasynyń qamqorynsyz qalǵan 400-deı jetkinshekke joldama beriledi.