Qostanaı oblysynyń ákimi Arhımed Muhambetov «Biz Birgemiz» respýblıkalyq aksıasy sheńberinde muqtaj jandarǵa kómek kórsetken belsendi volonterlerdi QR Tuńǵysh Prezıdenti Nursultan Nazarbaevtyń Alǵys hattarymen marapattady.

Saltanatty shara barysynda aımaq basshysy «Jas Otan» jastar qanatynyń volonterleriniń eńbegin atap ótti. Óńir basshysy aıtqandaı, 9 myńnan astam otbasyǵa azyq-túlik, maska jáne áleýmettik mańyzy bar taýarlar jetkizilgen.

Arhımed Muhambetov Qostanaıda ıgi ispen aınalysyp, karantın ýaqytynda muqtaj jandarǵa kómek qolyn sozǵan 15 eriktini marapattady. Jalpy oblys boıynsha Elbasynyń atynan 122 erikti alǵys hatqa ıe boldy.

«Koronavırýs dertine baılanysty búkil álem jurtshylyǵy kúrdeli daǵdarysqa ushyrady. Muny jaqsy bilesizder. Koronavırýs indeti elimizdi, onyń ishinde oblysymyzdy da aınalyp ótken joq. Jalpy karantın rejımi azmattarymyzǵa aıtarlyqtaı qıynshylyq týǵyzyp keledi. Degenmen, oblys turǵyndary osy indetke qarsy kúresý úshin judyryqtaı jumyla bildi.Osy rette sizderdiń qosqan úlesterińiz óte zor. Muqtaj jandarǵa azyq-túlik pen dári-dármek jetkizip, blokposttardaǵy kúni-túni qyzmetin atqaryp jatqan tártip saqshylary men dárigerlerge ystyq tamaq aparyp, qaıyrymdy istiń basy qasynda tózimdilik pen qamqorlyq tanytyp júre bildińizder. Sizderge aıtar alǵysym sheksiz», — dedi Qostanaı oblysynyń ákimi Arhımed Muhambetov.

Aıta ketý kerek, oblys mesenattarynyń qoldaýymen 136 mln teńgeden asatyn somaǵa kómek kórsetildi. Elbasynyń bastamasymen qurylǵan «Birgemiz» qory muqtaj azamattarǵa 50 myń teńge kóleminde tikeleı aqshalaı kómek kórsetý týraly sheshim qabyldady. Oblys boıynsha 1 mlrd teńgeden astam somaǵa 21630 azamatqa gýmanıtarlyq járdem usynyldy.