Qostanaılyq kásipkerlerdi qoldaý úshin qosymsha qarjy bólindi. Bul týraly oblys ákimdiginde ótken jıynda kásipkerlik jáne ındýstrıaldy-ınovasıalyq damý basqarmasynyń basshysy Oljas Saparbekov aıtyp berdi. Sondaı-aq, «Qarapaıym zattar ekonomıkasy» aıasynda Qostanaıda 424 jumys orny ashylmaq.

Jergilikti kásipkerlerdi qoldaý úshin óńirde «Qarapaıym zattar ekonomıkasy» baǵdarlamasynyń múmkindikteri tolyq paıdalanylýda. Máselen, jyl basynan beri baǵdarlama boıynsha 43,2 mlrd teńge bolatyn 248 joba iske asyryldy.

«Taǵy 15 aýqymdy joba ekinshi deńgeıli bankter men Aýyl sharýashylyǵyn qoldaý qorynda qaralyp jatyr. «Qarapaıym zattar ekonomıkasy» baǵdarlamasyn iske asyrý boıynsha bizdiń oblys respýblıkada 4-shi orynǵa turaqtady. Búginge deıin 424 turaqty jumys orny ashyldy. Jylyna 20 myń tonna et óndiretin «BEEF EXPORT GROUP» zaýytyn salý arqyly 200-deı adamǵa jumys tabyldy», — deıdi basqarma basshysy Oljas Saparbekov.

Kásipkerlik jáne ındýstrıaldy-ınovasıalyq damý basqarmasynyń aqparatyna súıensek, oblysta «Bıznestiń jol kartasy-2025» aıasynda kásipkerlerdi qoldaý úshin 2,7 mlrd teńgeden astam qarajat bólindi. Keıin daǵdarysqa qarsy sharalar aıasynda respýblıkalyq búdjetten qosymsha taǵy 2 mlrd teńge aýdarylǵan. Bul qarjat karantın ýaqytynda qıyndyqqa tap bolǵan kásipkerlerge aıtarlyqtaı kómek boldy. Ótken jylmen salystyrsaq, osy jyly nesıelerdi sýbsıdıalaý úshin qarjy 2 ese kóp bólingen. Nátıjesinde kepildendirý somasy 6 ese ulǵaıǵan.