Qostanaı oblysynda shaǵyn jáne orta bıznesti qoldaý úshin qosymsha qarjy bólindi. Bul týraly oblys ákimi Arhımed Muhambetov depýtattarǵa esep berý jıynynda málim etti.
Eldegi ekonomıkalyq ahýal kúrdelenip, karantın jalǵasqan ýaqytta bıznes memleket tarpynan aıyryqsha qoldaýdy qajet etti. Osyǵan baılanysty Qostanaı oblysynyń kásipkerleri úshin de qoldaý sharalary qabyldandy. Jalpy memleket tarapynan bıznesti qoldaýdyń tórt baǵyty belgilendi. Olar: jeńildetilgen nesıe berý, syıaqy mólsherlemesin sýbsıdıalaý, nesıege kepildik berý, klıentterdi onlaın oqytý ári qarjy ınstıtýttaryna deıin súıemeldeý. Mine, shaǵyn jáne orta bızneske qoldaý kórsetýdiń arqasynda oblys kásiporyndary jeńildikterge ıe boldy.
«Memleket pen kásipkerlerdiń múddelerin qatar eskere otyryp, bıznestiń damýyna tıimdi ári qolaıly orta qalyptastyrý – bizdiń basty mindetimiz. Shaǵyn jáne orta bıznes sektoryn qoldaý maqsatynda birqatar turaqtandyrý sharalary qabyldandy. Tótenshe jaǵdaı kezinde qarjylyq jaǵdaıy nasharlaǵan kásiporyndarǵa ekinshi deńgeıdegi bankterden 15,9 mlrd. teńgeden astam somaǵa 74 nesıe berildi. Buǵan qosa memlekettik baǵdarlamalarǵa qatysqan 150 kásiporynnyń nesıesi keıinge shegerildi. Salyq jeńildikteri sheńberinde qıyndyqqa tap bolǵan kásipkerlerge 8 mlrd. teńgeden astam somaǵa salyq aýdarymdaryn tóleýdi keıinge qaldyrý usynyldy. Kásipkerlerge kómek kórsetýimiz kerek. Óıtkeni, olar – ekonomıkamyzdyń tiregi. Ákimdikter jergilikti kásiporyndardyń ónimin kem degende 6 aı boıy kepildi satyp alý tártibin jolǵa qoıyp otyrdy», — dedi oblys ákimi Arhımed Muhambetov.
«Bıznestiń jol kartasy-2025» baǵdarlamasyn júzege asyrý aıasynda Qostanaı kásipkerlerine 17,3 mlrd teńge nesıe somasyna 147 jobaǵa qoldaý kórsetildi. Budan bólek shaǵyn jáne orta bıznes ókilderi bıylǵy 1 qazanǵa deıin eńbekaqy tóleý qorynan ustalatyn salyqtan bosatyldy. Eske salsaq, QR Prezıdenti Qasym-Jomart Toqaevtyń sheshimimen «Qarapaıym zattar ekonomıkasy» baǵdarlamasyn qarjylandyrý kólemi artyp, otandyq bıznesti qoldaý úshin 1 trln teńge bólinedi. Buǵan deıin óńir basshysy Arhımed Muhambetovtiń oblystyq máslıhat depýtattaryna esep bergeni habarlandy.
