QR Densaýlyq saqtaý mınıstri Alekseı Soı Qostanaı oblysynyń ákimi Arhımed Muhambetovpen kezdesti. Oblys ákiminiń baspasóz qyzmeti málim etkendeı, qos tarap Qostanaı qalasynda kópbeıindi aýrýhana salý týraly memorandýmǵa qol qoıǵan.

Bul maqsatta bıyl jalpy aýdany 20 gektar jer ýchaskesi bólindi. Aýrýhanada 400 kereýet-oryn bolmaq. 6 qabatty ǵımarattyń jalpy aýdany – 67 myń sharshy metr. Joba memlekettik-jekemenshik áriptestik esebinen júzege asyrylady. Jańa aýrýhananyń stasıonary birneshe bólikke jiktelgen. Atap aıtqanda, kardıologıalyq bólimge 90 kereýet, nevrologıa –65, hırýrgıa –155, terapıa –70, ońaltý sharalary úshin 20 oryn qarastyrylǵan.

Jańa kópbeıindi aýrýhana eń zamanaýı medısınalyq tehnıkamen jabdyqtalady. MRT, KT, rentgen, mammograf, ostıodensıtometr syndy qural-jabdyqtar memlekettik-jekemenshik áriptestik sheńberinde satyp alynady.

Sonymen qatar, Qazaqstan Respýblıkasy Premer-Mınıstriniń orynbasary Eraly Toǵjanov basshylyǵymen otandyq óndiristiń 24 jyljymaly medısınalyq kesheni elimizdiń soltústiktegi tórt óńirdegi aýdandyq aýrýhanalardyń qyzmetkerlerine saltanatty túrde tabys etilgenin aıta ketken jón.

Vıse-premer E.Toǵjanov quttyqtaý sózinde Memleket basshysy men Úkimet atynan elimizdiń barlyq medısına qyzmetkerlerine qajyrly eńbekteri úshin shyn júrekten alǵysyn bildirdi. El basshylyǵy sapaly medısınalyq kómek kórsetý úshin aýrýhanalardy zamanaýı medısınalyq jabdyqtarmen jabdyqtaý boıynsha sharalar qabyldanǵanyn erekshe atap ótti. JMK otandyq avtokólńk negizinde qurylǵan jáne kóshpeli jaǵdaıda azamattardyń densaýlyǵyn zertteýdiń keń spektrine arnalǵan.

Keshen sandyq quraldarmen jabdyqtalǵan 7 mamandandyrylǵan kabınetten turady: jalpy qabyldaý kabıneti, jalpy praktıka dárigeriniń aımaǵy, taldaýlardy qabyldaý aımaǵy, dárihana pýnkti, fýnksıonaldyq dıagnostıka testileri, akýsher-gınekolog kabıneti, sáýlelik dıagnostıka kabıneti. Sonymen qatar, mobıldi medısınalyq ortalyqta arnaıy qorǵasynmen qaptalǵan bólme ornatylǵan, onda rentgen jáne flúorografıany qaýipsiz jasaýǵa bolady. Júıeniń bógde adamnyń járdemine muqtaj adamdar úshin ınfraqurylymdyq júıemen jabdyqtalýy óte mańyzdy — pandýs-lıft múmkindigi shekteýli adamdardy qabyldaýdy qoljetimdi etedi.

Atalǵan keshender aýdan ortalyqtarynan 100 km astam qashyqtyqta ornalasqan aýyldyq okrýgterde medısınalyq qyzmetterdi joǵary deńgeıde kórsetýge múmkindik beredi. Aǵymdaǵy jyldyń 23 qazanyna deıin Qazaqstannyń óńirleri 100 JMK-men qamtamasyz etiledi. Óz kezeginde medısına qyzmetkerleri memleket tarapynan jan-jaqty qoldaý kórsetilip kele jatqanyna zor rızashylyq sezimderin bildirdi. Osyndaı keshenderdiń arqasynda dárigerler aýyl turǵyndaryna sapaly kómek kórsetip, Qazaqstan azamattarynyń densaýlyǵy men ómir súrý uzaqtyǵyn jaqsarta alatynyn atap ótti.