Qostanaıda COVID-19 juqtyrǵan naýqastardy emdeýge arnalǵan jańa ınfeksıalyq aýrýhana paıdalanýǵa berildi. Qalanyń shetindegi ashyq alańda bir jazdyń ishinde boı kótergen jańa zamanaýı stasıonar búginnen bastap naýqastardy qabyldaı bastady. Atalmysh aýrýhananyń jumysyn óńir basshysy Arhımed Muahmbetov kórip qaıtty.

Stasıonardyń joǵarǵy tehnologıalyq zamanaýı qurylǵylarmen qamtylǵan arnaıy zerthanasy, dıagnostıka ortalyǵy, ota jasaıtyn bólimi bar. Infeksıalyq ortalyqtyń basty ereksheligi – munda dárigerler naýqasqa arnaıy qondyrylǵan planshet arqyly qashyqtan baqylaý júrgize alady.

Bul ınfeksıalyq stasıonar oblystyq aýrýhanaǵa qaraıdy. Munda naýqastardy ottegimen qamtamasyz etýdiń ortalyqtandyrylǵan júıesi bar. Iaǵnı, 8 tonna suıyq ottegi arnaıy sısternaǵa quıylyp, qajet bolǵan jaǵdaıda ár tósekke ornatylǵan qurylǵy arqyly naýqasqa qosylady. Stasıonardaǵy qaldyqtardy joıýdyń tıimdi jolyn qarastyrý da eskerilgen. Qaldyqtardy untaqtap, zararsyzdandyryp, qorshaǵan ortaǵa zıan keltirmeýin qamtamasyz etetin arnaıy júıe jumys istep tur.

Sozylmaly gemodıalızi bar jáne koronavırýspen aýyrǵan naýqastardyń qanyn tazartý qajet bolǵan jaǵdaıda, gemodıalızden ótkizý úshin sý tazartatyn, sý daıyndaıtyn biregeı júıe bar. Ol jansaqtaý tósekterine qosýly turǵandyqtan, naýqasty mazalap basqa jaqqa aýystyrýdyń keregi joq. Qabyldaý bóliminiń ereksheligi týraly da aıta ketken jón. Munda KT qurylǵysy men rentgen aparaty tur.

Bul qurylǵylardyń kómegimen aýrýhanaǵa túsken naýqas birden negizgi dıagnostıkalyq zertteýlerden ótedi. Barlyǵy zamanaýı jeńil plastık materıaldardan jasalǵan. Sondyqtan tez jýylyp, tez zararsyzdanady. Ár palatada 2-3 tósek qoıylǵan. Óte qolaıly, jaryq ári jyly. Naýqastar dárethana, arnaıy tazartýdan ótken aýyz sýmen qamtamasyz etilgen. Bul indet juqtyrǵan naýqasqa da, ony emdeıtin dárigerge de psıhologıalyq turǵydan qolaıly jaǵdaı týǵyzady.

Qazir naýqastardyń kóbi ambýlatorıalyq jaǵdaıda emdelip jatyr. Sondyqtan qazirshe jańa ınfeksıalyq stasıonardyń medısınalyq qyzmetkerler jetkilikti. Alaıda aldaǵy ýaqytta 200 naýqasqa deıin qabyldaıtyn bolsaq, bizge qosymsha medısınalyq qyzmetkerler men paramedıkterdi jumysqa alýǵa týra keledi.

​Infeksıalyq ortalyq 200 naýqasqa shaqtalǵan. 20 oryndyq jan saqtaý bólimi, endoskopıalyq jáne últradybyspen emdeý bólimi taǵy bar.

​Jańa aýrýhanany taza jáne las aımaqqa bólip turatyn 8 modýl qarastyrylǵan. Ortalyq ǵımarattarynyń qos qaptalynda bir-birine qarama-qarsy ornalasqan eki esik bar. Koronavırýs juqtyryp, aýrýhanaǵa jetkizilgen naýqastar birinshi esikten kiredi. Al dertinen aıyqqan adamdar ǵımarattyń ekinshi jaǵyndaǵy basqa esikten shyǵady. ​Bir qabatty aýrýhana ǵımaratynyń jalpy aýdany 6800 sharshy metr bolady.

Aıdan Narymbaevtyń aıtýynsha, munda aýany tazartyp otyratyn keri jeldetkish ornatylǵan. Iaǵnı, palatadaǵy las aýa dálizge shyqpaıdy. Aýrýhanadaǵy barlyq aýa arnaıy zalalsyzdandyrý qurylǵysy arqyly súzgiden ótip, tazartylǵan kúıde dalaǵa bólinip shyǵady.