Qostanaıda 5788 adam jumysqa ornalasty. Bul týraly oblys ákimi áleýmettik jelide jazdy. Oblys basshysy Arhımed Muhambetov «Jumyspen qamtýdyń jol kartasy – 2020» memlekettik baǵdarlamasyn júzege asyrý máseleleri boıynsha qala jáne aýdan ákimderimen keńes ótkizdi.
Osy jyly oblysta 282 ınfraqurylymdyq joba iske asyrylýda, onyń ishinde 75–i áleýmettik-mádenı obektilerde, 43-i turǵyn úı-kommýnaldyq sharýashylyq salasynda. Sondaı-aq taǵy 150-den astam aýqymdy joba ınjenerlik-kóliktik ınfraqurylym obektisi men eldi mekenderini abattandyrý boıynsha atqarylyp jatyr.
«Barlyǵy 14340 jumys ornyn qurý jáne jumyspen qamtý ortalyqtarynyń joldamalary boıynsha keminde 7 170 jumyssyz azamatty jumysqa ornalastyrý josparlanǵan. Jumystar aıaqtalǵannan keıin 682 turaqty jumys orny ashylady. Búgingi tańda Jumyspen qamtý ortalyqtarynyń joldamalary arqyly 5788 adam jumysqa ornalastyryldy. JQJK jobalarynda jalaqy mólsheri orta eseppen 86 331 teńge bolyp belgilengen», — dep jazdy Arhımed Muhambetov áleýmettik jelide.
Óńir ákimi jumyspen qamtý jumystary boıynsha aýdan-qala ákimderine jekeleı tapsyrma berdi.
Sonymen qatar, оblys ákimi Arhımed Muhambetovtiń tóraǵalyǵymen keńeıtilgen aparat otyrysy ótkizildi. Onda aýyldardy sýmen jabdyqtaý máselesi talqylandy. Arhımed Muhambetov 2025 jyldyń sońyna qaraı óńirdegi barlyq aýyl sapaly aýyz sýǵa qosylatynyn aıtty.
«Nurly jer» baǵdarlamasyna sáıkes, aýyldyqtardyń ortalyqtandyrylǵan aýyz sýǵa qoljetimdiligin 100% qamtamasyz etý qajet. Aǵymdaǵy jyly 9,6 mlrd teńge somasyna aýyldardy sýmen jabdyqtaý boıynsha 37 joba iske asyrylýda, onyń ishinde 22 joba bastalyp ketti. Joba sheńberinde 29 aýyldy sapaly sýmen qamtamasyz etý josparlanýda. Bul aýyl halqyn sýmen jabdyqtaýdyń qoljetimdiligin 61,7%-dan 65%-ǵa deıin arttyrady. Keleshekte taǵy 41 jobany iske asyrý boıynsha josparlar bar.
–Kelesi jyldan bastap turǵyn sany 300 jáne odan joǵary aýyldar úshin ortalyqtandyrylǵan sýmen jabdyqtaý qurylysyn nemese sýdy tazartý jáne taratý pýnktterin salýdy júzege asyramyz. Al 300 adamnan kem turatyn aýyldar úshin arnaıy sý taratý beketteri ornatylady. Bul is-sharalar 2025 jyldyń sońyna qaraı aıaqtalady», — dedi óńir basshysy.
Arhımed Muhambetov aýyl turǵyndaryn aýyz sýmen qamtamasyz etý jumystaryn sapaly júrgizýdi tapsyrdy.
